Regueifas de Ciencia pecha a súa quinta tempada cun debate sobre eólicos

• Celebrarase o vindeiro martes 27 de xuño en A Nave de Vidán (Santiago de Compostela) ás 19.30h e contará con intérpretes de lingua de signos.

• É o derradeiro debate da quinta tempada e centrarase en responder á pregunta “Son os eólicos compatibles co ambiente e a sostibilidade?”, un tema que foi escollido polos seguidores de Regueifas a través dunha consulta votación en redes sociais.

• Regueifas de Ciencia é unha iniciativa da Universidade de Santiago de Compostela (USC) e conta coa colaboración de FECYT, a Fundación Española para a Ciencia e a Tecnoloxía – Ministerio de Ciencia e Innovación.

Santiago, 25 de xuño de 2023.- Galiza é un dos principais produtores de enerxía procedentes de fontes limpas e renovables do Estado, pero os aeroxeneradores, que noutros contextos son símbolos de conciencia ecolóxica, son tema de disputa social e política no país. A veciñanza e organizacións ecoloxistas presionan ás administracións e mobilizan á sociedade fronte ao que consideran unha invasión e unha ameaza para o seu patrimonio natural, arqueolóxico e para a existencia mesma de núcleos de poboacion rural. Mais a eólica é unha das alternativas máis ecolóxicas e baratas de produción de electricidade nunha situación de alza de prezos, cambio climático e de necesidade de baixada de emisións. 

Os eólicos son fonte de polémica social e enfrontamento e que fosen escollidos como tema de debate pola audiencia de Regueifas de Ciencia non foi unha sorpresa para o equipo organizador: “Este é o tipo de temas que traemos a Regueifas, asuntos que interesan e sobre os que precisamos máis información, escoitar aos expertos e ver un debate pausado e baseado na evidencia científica existente”. Neste contexto, catro expertas e expertas debaterán dende dúas posicións enfrontadas para responder á pregunta “Son os eólicos compatibles co ambiente e a sostibilidade?”.

No equipo do “si” estarán:

• Xabier Monteagudo, Responsable de desenvolvemento de negocio en Galicia de Capital Energy

• Carlos Rodríguez, director de proxectos en Emberiza, consultor ambiental

No equipo do “non” estarán

• Serafín González Prieto, Presidente da Sociedade Galega de Historia atural

• Rosa Regueiro, investigadora en economía ecolóxixa da Universidade de Santiago de Compostela.

Os debates poden ser seguidos en directo, por streaming ou velos gravados

Os debates de Regueifas de Ciencia poden ser seguidos en directo dende a sala (entrada libre e haberá intérprete de lingua de signos), por streaming en www.regueifas.org/streaming ou poden ser vistos despois na web ou a través da canle de YouTube. “Tratamos de facilitar que calquera persoa interesada poida ver os debates. Incluso poden preguntar aos relatores dende a casa e ser respondidos”, comentan dende o equipo organizador. Contarase con servizo de interpretación de Linguaxe de Signos.

Ao longo das edicións anteriores tratáronse temas como a experimentación animal, a modificación xenética, industria alimentaria, enerxía nuclear, sobre o eucalipto, preguntámonos se debería a ciencia axudarnos a vivir para sempre, sobre a industria química... e tamén sobre o clásico dilema da compatibilidade da ciencia e a fe. Para tratar estes temas, visitaron a sala de debate expertos dos diferentes campos, entre outros moitos JM Mulet, Antonio Martínez Ron, Paloma Llaneza, Julio Basulto, Marta Peirano, Anna Veiga, Fernando Savater, Lluís Montoliú, Óscar Horta, Jorge Mira... e tamén caras moi coñecidas, como os polémicos Fernando Sánchez Dragó e Aubrey De Grey.

Xa temos equipos gañadores e data de Regueifiñas. Será o 15 de xuño

O pasado 17 de maio, o xurado de Regueifiñas comunicaba a resolución do III certame aos equipos participantes:

“O xurado da III Edición de Regueifiñas (2023) decidiu que os equipos gañadores do concurso e, polo tanto, equipos que se enfrontarán no debate final en Santiago de Compostela sexan:

• O equipo formado por Clara S. e André R. do IES Plurilingüe A Paralaia de Moaña. (Docente Sofía Calo)

• O equipo formado por  Sara I. e Lúa D. do IES Allariz (Docente Nuria López)

O xurado quere destacar a calidade de todas as candidaturas recibidas, que suben o nivel de cada edición e fan cada vez máis dificil escoller a só dous equipos gañadores.

Ademais, quere agradecer a todos e todas as docentes implicados na participación neste concurso e felicitalos tanto pola calidade das candidaturas e o grande interese e relevancia dos temas escollidos, como por motivar ao seu alumnado a ir máis aló e traballar o seu pensamento crítico. 

Agardamos que as nosas propostas vos sexan de interese no futuro.

En Santiago de Compostela, a 16 de maio de 2023.

O debate final terá lugar en Santiago de Compostela o xoves 15 de xuño e o título é “Soluciona o coche eléctrico os problemas ambientais da mobilidade? “. Tralo sorteo, os bandos resultantes son:

• Do lado do “si”: Clara S. e André R. do IES Plurilingüe A Paralaia de Moaña

• Do lado do “non”: Sara I. e Lúa D. do IES Allariz

Moita sorte!

Regueifiñas: a final

Este mediodía tivo lugar o debate final do certame Regueifiñas. As representantes do IES Aquis Querquernis e IES Valga foron elexidos polo comité científico de Regueifas de Ciencia como os mellores de entre os 14 equipos de toda Galicia que se presentaron ao concurso.

O debate, que se desenvolveu no Auditorio da facultade de comunicación da Universidade de Santiago de Compostela (sen público) e que se emitiu en streaming, preguntaba se debería ser obrigatoria a vacina da COVID-19. Unha vez máis, os dous equipos, que defendían unha posición que lles tocara por sorteo, demostraron unha enorme capacidade dialéctica e de estudo e preparación do tema.

Ao rematar a contenda, fóronlles entregados os premios. Por mor da pandemia, non foi posible facer a visita aos Centros Singulares, que quedou adiada ao inicio do curso 2021-2022, cando a situación sanitaria sexa máis favorable.

Moitos parabéns aos dous equipos e aos seus profesores e profesoras por tan bo traballo e ata a próxima Regueifiña de Ciencia!

Se perdiches a Regueifiña, agora podes vela completa!

VOLVEN AS REGUEIFA DE CIENCIA: ESTÁ A INDUSTRIA QUÍMICA CREANDO UN MUNDO TÓXICO?

• Regueifas de Ciencia para o pensamento crítico, iniciativa da Universidade de Santiago de Compostela volve en 2021 en modalidade virtual.

• A primeira Regueifa desta edición terá lugar este xoves día 28 de xaneiro ás 19.30h e poderá seguirse en Regueifas.org/streaming ou na súa canle de YouTube

• A actividade está financiada pola FECYT (Fundación Española para a Ciencia e a Tecnoloxía), pertencente ao Ministerio de Ciencia e Innovación.

No último século tense dobrado a esperanza de vida da poboación mundial. A contribución da química neste feito é innegable, ao participar na creación de fertilizantes, fármacos, desinfectantes, antibióticos ou novos materiais. En paralelo a este desenvolvemento, prodúcese unha grande exposición das persoas a milleiros de substancias. Para controlar a seguridade de calquera substancia sintetizada en cantidades maiores a unha tonelada ao ano, a Unión Europea creou o mecanismo de rexistro, avaliación, autorización e restrición de substancias químicas (REACH). Porén, existen voces que alertan sobre a ineficacia deste mecanismo, ao non ter en conta efectos cruzados sinérxicos ou unha potencial actividade como disruptores endocrinos a moi baixas concentracións. 

Neste contexto, o debate lanza a pregunta de se o desenvolvemento da química está construíndo un mundo mellor ou, pola contra, estamos atentando contra o medio e a nosa propia saúde. Dous equipos, cada un defendendo unha postura diferente, enfrontaranse con tempos pautados e un moderador imparcial (o xornalista científico Manuel Vicente) para que o público acade unha opinión informada sobre este asunto. 

Este formato de debate, a modalidade escollida pola organización de Regueifas, coñécese como de tipo Oxford e coas súas regras se teñen celebrado xa doce Regueifas de Ciencia dende 2016, tocando temas tan polémicos como os transxénicos, a enerxía nuclear, a edición xenética en embrións humanos ou o eucalipto.  Todos os debates poden verse completos na web www.regueifas.org.

Os equipos

Este xoves catro expertos e expertas debaterán sobre se estamos a crear un mundo tóxico. No equipo do non:

• José Manuel López Nicolás, Scientia. Catedrático de bioquímica e bioloxía molecular. Universidad de Murcia

• Moisés Canle López, catedrático de química física. Universidade de A Coruña.
  
  No equipo do si:

• Dolores Romano Mozo, responsable de políticas de substancias químicas do European Environmental Bureau

• Marieta Fernández, Catedrática da Universidad de Granada e investigadora da  rede CIBER Epidemología y Salud Pública (CIBERESP)

Este ano Regueifas de Ciencia celebrarase exclusivamente en liña. En todas as edicións anteriores existiu a posibilidade de seguir as Regueifas a través da emisión en directo dende a súa web, mais este ano e debido á situación sanitaria, esta será a única opción para asistir aos debates. A pesar disto, o público de Regueifas poderá realizar as votacións iniciais e finais características de Regueifas e, por suposto, poderá formular aos relatores e relatoras as preguntas que estime oportuno.

 Regueifas de Ciencia é unha iniciativa da Universidade de Santiago de Compostela e está financiada pola FECYT, a Fundación Española para la Ciencia y la Tecnología. A súa primeira edición celebrouse en 2016 e todos os debates poden volver a verse en regueifas.org. 

ESTÁ XUSTIFICADA A MALA SONA DO EUCALIPTO? CUARTO (E ÚLTIMO!) DEBATE DE REGUEIFAS DE CIENCIA 2018

A última Regueifa desta edición 2018/2019 terá lugar o luns 11 de marzo ás 20h no salón de actos da Facultade de Ciencias da Comunicación da Universidade de Santiago de Compostela.

• O debate será retransmitido en directo en regueifas.org/streaming

Poucos debates polarizan tanto á sociedade galega nos últimos tempos como o que se xera arredor do eucalipto. Para uns, unha especie invasora que leva décadas ameazando os ecosistemas dos bosques galegos. Para outros, un dos motores económicos claves do país, xerador de emprego e riqueza. Unha cuestión que precisa de moitas lecturas diferentes (social, política, económica, científica…) e que non podíamos deixar de analizar nesta despedida das Regueifas de Ciencia 2018/2019.

Defendendo que a mala sona do eucalipto está xustificada estarán:

• Serafín González Prieto, Presidente da Sociedade Galega de Historia Natural.

• Adolfo Cordero Rivera, Profesor titular da Universidade de Vigo.
  

Defendendo o contrario contaremos con:

• Francisco Díaz-Fierros Viqueira, Catedrático emérito.

• Manuel Marey Pérez, Catedrático de proxectos de enxeñaría na Universidade de Santiago.
  

ATENCIÓN: Ampliamos prazo de preinscrición a Regueifiñas

Lemos e escoitamos as vosas mensaxes e por iso decidimos ampliar o prazo do 12 de decembro ao 21 de decembro para que vos poidades preinscribir en Regueifiñas.

Lembrade que teredes ata o mes de febreiro para preparar e enviar os vosos vídeos e que se precisades resolver algunha dúbida ou facernos algún comentario, podedes escribir a info@regueifas.org.

Ánimo e a polos debates!