Xa podes ver a gravación do primeiro debate

Cando o vexas podemos seguir debatindo nas redes. En Twitter usamos o hashtag #Regueifas1.

'Regueifas de Ciencia', debates intelixentes sobre temas apaixoantes

Este venres, ‘Son os transxénicos unha opción válida e segura?’

Imaxe: Xornal USC

Unha regueifa é unha disputa dialéctica improvisada e en verso entre dúas persoas sobre un tema determinado. Tirando deste termo, a USC co financiamento da FECYT comeza este venres 8 cunha nova actividade de divulgación científica, de entrada libre, na que catro reputados especialistas debaterán acerca dun tema de especial transcendencia e certa polémica. 

A exposición e confrontación de ideas é consubstancial ao coñecemento científico e por iso os debates, ademais de dar a coñecer os argumentos das distintas posicións ao redor dun tema, cumpren unha función de aprendizaxe e enriquecemento na audiencia que participa del, “chegando mesmo a conseguir cambiar posturas de partida”, explica a catedrática de Xenética e directora do proxecto, Laura Sánchez Piñón. De feito, para comprobar a efectividade desta clase de confrontacións dialécticas, á entrada na sala preguntaráselle ao público –a través dun sistema de voto electrónico– cal é a súa postura inicial sobre o tema a tratar, que será confrontada xusto ao remate do debate.

Sánchez Piñón presentou este mércores os detalles do proxecto xunto co investigador do IDIS, Manuel Collado Rodríguez, e o doutor en Ciencias Químicas e director do programa ‘Efervescencia’ da Radio Galega, Manuel Vicente García. A xenetista lembrou que a USC está sempre á cabeza das institucións que conseguen proxectos da convocatoria Fecyt, “polo que podemos falar dunha universidade con clara vocación divulgadora”, dixo.

Formato ‘Oxford’
A organización dos debates manterá unha postura imparcial e propón un formato moi coñecido como é o ‘Oxford’. Isto é, un moderador, dous bandos e tempos controlados; todo cunha gran formalidade. Equipos con posturas enfrontadas formados por dúas persoas relevantes no seu eido. 

A ‘regueifa’ entre catro poderá seguirse tamén a través de streaming, unha emisión que se gravará e publicará na web do proxecto facendo posible así que os docentes utilicen este debate como ferramenta nas aulas.

Transxénicos
A primeira ‘Regueifa da ciencia’ terá lugar este venres 8 ás 20.00 horas en Ciencias da Comunicación (Universidade de Santiago de Compostela) coa cuestión ‘Son os transxénicos unha opción válida e segura?’. Defendendo unha postura favorable participarán o profesor de biotecnoloxía da Politécnica de Valencia e director do Máster de Biotecnoloxía Molecular e Celular de Plantas, J.M. Mulet, e o catedrático da Politécnica de Madrid e autor das primeiras patentes sobre plantas transxénicas realizadas en España e vendidas no mercado internacional, Francisco García Olmedo.

Do outro lado, sostendo argumentos en contra, estarán a responsable de Agricultura e Alimentación de Amigos da Terra, Blanca Ruibal, e o entomólogo e profesor de Zooloxía e Bioloxía da Conservación na Facultade de Ciencias Ambientais e Bioquímica da Complutense, José Luis Yela.

O proxecto contempla tres debates máis, previstos para os meses de xuño, setembro e novembro, sobre cuestións tan transcendentais e polémicas sobre a conveniencia das vacinas ou a necesidade de experimentar con animais.

Case tódolos membros do equipo organizador de Regueifas tras a presentación á prensa.

Boa acollida ao anuncio de Regueifas de ciencia

Dende que o pasado luns fora anunciado o comezo da iniciativa Regueifas de Ciencia en medios sociais, o proxecto ten recibido a atención de diversos medios de comunicación (nun par de días, o mércores 6 terá lugar a rolda de prensa presentación) e ao mesmo tempo está sendo moi ben recibida nas canles nas que  está presente: Facebook e Twitter, onde o debate xa comezou entre persoas dunha e outra postura.

É precisamente ese debate, informado, intelixente e axustado ás boas maneiras entre as partes, o que se busca principalmente dende Regueifas, así que agardamos que siga así.

Compartimos este anaco do programa Efervesciencia, da Radio Galega, no que se da un pequeno adianto do debate: aparecen os relatores presentándose e tamén a organizadora, Laura Sánchez.

Primeiro debate! Son os transxénicos unha opción válida e segura?

Como xa sabes, en Regueifas de Ciencia queremos propor debates vivos e apaixoantes sobre temas de interese. Pois ben, aquí tes a nosa primeira proposta, queremos que veñas ao debate "Son os transxénicos unha opción válida e segura?".

O formato do debate é tipo Oxford, isto é, hai un moderador, tempos controlados, e dous bandos. Dous equipos de posturas enfrontadas formados por expertos no tema, persoas relevantes no seu eido que defenderán a súa postura.

Ti tes claro de qué lado estás? Veremos se ao salir do debate segues no mesmo!

O debate terá lugar en Santiago de Compostela o vindeiro venres 8 de abril e os poñentes serán:

• Blanca Ruibal, Responsable de Agricultura e Alimentación de de Amigos da Terra
• José Luis Yela, entomólogo e profesor titular de Zooloxía y Bioloxía da Conservación na Facultade de Ciencias Ambientais e Bioquímica.
• J.M. Mulet, profesor titular de biotecnoloxía (área de bioquímica e bioloxía molecular) na Universidade Politécnica de Valencia, Director do Máster de Biotecnología Molecular e Celular de Plantas (CSIC-UPV) e investigador no Instituto de Bioloxía Molecular e Celular de Plantas (IBMCP).
• Francisco García Olmedo,  doctor enxeñeiro Agrónomo e licenciado en Química. Catedrático da Universidade Politécnica de Madrid. Ten investigado sobre enxeñaría xenética das prantas na ETS de Enxeñeiros Agrónomos da Universidade Politécnica de Madrid. 

Benvidos a Regueifas de Ciencia!

Regueifas de Ciencia é unha iniciativa da Universidade de Santiago de Compostela e está financiada pola Fundación Española para a Ciencia e a Tecnoloxía (FECYT), pertencente aoMinisterio de Economía y Competitividad.

A exposición e confrontación de ideas é consustancial ao coñecemento científico. A actividade do debate busca expor e dar a coñecer as posturas, fundamentos e argumentos das distintas posicións ao redor dun tema. Ademais, cumpre unha función de aprendizaxe e enriquecemento na audiencia que participa do mesmo, permitindo con iso formar opinións fundamentadas na sociedade, chegando mesmo a conseguir cambiar posturas de partida ou a profundar e enriquecer a postura propia.

A rapidez e sobreexposición á información na que vivimos carece moitas veces da análise e escrutinio capaz de formar unha opinión fundamentada libre de prexuízos ou visións partidistas.

Por iso pensamos que propor debates ao redor de temas de enorme actualidade e transcendencia para a sociedade, con relatores de formación e capacidade excepcionais son unha resposta adecuada que desde o ámbito universitario débese ofrecer á sociedade. Os debates que propomos serán intelixentes, actuais, provocativos e audaces; pero tamén ordenados, disciplinados, e informativos.

Se queres estar ao día de tódalas novidades e eventos, agardámoste nesta web e nas redes sociais! 

BENVIDOS

Blog RSS